3 май куни АҚШнинг Луизиана штатида Иккинчи жаҳон уруши фахрийси бўлган Фрэнк Левингстон 110 ёшида оламдан ўтган. Бу ҳақда Associated Press хабар тарқатган.

Левингстон 1905 йилнинг 13 ноябрида штатнинг шимолидаги қишлоқлардан бирида тавваллуд топган. У 1942 йилнинг 6 октябрида ҳарбий хизматга чақирилган ва 1943 йилнинг сентябрида Италияга туширилган иттифоқчилар армияси сафида ҳаракат қилган. У шунингдек, Шимолий Африка ҳудудидаги ҳарбий амалиётларда иштирок этган.

1945 йилда Левингстон ҳарбий хизматдан фахрий сифатида бўшатилган ва цемент саноати соҳасида ишлай бошлаган. У ҳеч қачон уйланмаган ва фарзанд кўрмаган.

Баъзи нашрларда Левингстон Иккинчи Жаҳон урушида иштирок этган фахрийларнинг энг кексаси сифатида айтиларди. Лекин бу маълумот расман тасдиқланмаган.

2015 йилнинг декабрида Левингстон Вашингтонда ўтказилган Перл-Ҳарбор фожиаси қурбонларини хотирлаш маросимида бошқа фахрийлар қаторида қатнашган.