Нидерландиялик мутахассис Луи ван Гаал "Манчестер Юнайтед" жамоаси бошқарувидан кетадиган бўлса, жамоа раҳбарияти унга 5 миллион фунт миқдоридаги маблағни компенсация сифатида тўлайди. Бу ҳақда The Times нашри хабар ёзган.

Томонларнинг 2014 йилнинг майида имзолаган келишувига кўра, мураббийнинг йиллик маоши миқдори 8 миллион фунт этиб белгиланган. Келишувга кўра, 64 ёшли мураббий муддатидан олдин ишдан бўшатилса, йиллик иш ҳақининг 66 фоизини олиши кўрсатилган, бу эса 5 миллион фунтдан ортиқроқни ташкил этади.

Бундан олдин "Манчестер Юнайтед" раҳбарияти жамоа кўрсатаётган натижалардан норозилиги айтилган, бир қатор нашрларда доимий равишда ван Гаалнинг мавсум якунида истеъфога чиқарилиб, унинг ўрнига португалиялик мутахассис Жозе Моуриньо олиб келиниши ҳақида хабарлар берилганди.

Ван Гаал "Манчестер Юнайтед" бошқарувига 2014 йилнинг майида келган. 2014/15 йилги мавсумда жамоа Англия чемпионатида тўртинчи ўринни эгаллади. Жорий мавсумда эса "Манчестер Юнайтед" 35 турда 60 очко тўплаб, турнир жадвалининг 5-поғонасини эгаллаб турибди.