Туркия бош вазири Аҳмет Довудўғлининг истеъфога чиқиши Брюссел ва Анқара ўртасида эришилган миграция келишувини хавф остига қўяди, деб тахмин қилмоқда Британиянинг Financial Times газетаси. 

Нашрнинг ёдга олишича, битимга мувофиқ, ноқонуний муҳожирлар ва қочқинлар Туркия орқали грек оролларига етиб олган тақдирда, ортга қайтарилади, ЕИ бунга жавобан турк фуқароларига визасиз киришни жорий этади. Мазкур келишув ўз кучида қолиши учун Туркия аксилтеррор қонунчилиги билан жиддий шуғулланиши, фуқаролар ҳуқуқларини таъминлаш борасидаги сиёсатини қайта кўриб чиқиши лозим бўлади. ЕИ Довудўғлининг кетиши билан расмий Анқара ваъда қилган ислоҳотларни ўтказмаслигидан хавотирда. 

Нашрнинг дипломатик манбалари фикрича, Германия канцлери Ангела Меркель Довудўғли раҳбарлик қилаётган европапараст партиянинг ўрни мустаҳкамланишидан умид қилган, аммо эндиликда аксинча Европа билан яқинлашиш тарафдорларининг позицияси сезиларли заифлашди, дейиш мумкин. 

FT’га маълум қилган турк расмийларининг айтишларича, Эрдўған Довудўғлининг ЕИ билан яқинлашуви туфайли халқаро сиёсат майдонида ўз ўрнини йўқотишидан хавотирга тушган. Ана шу ҳолат, икки сиёсатчининг муносабатлари салбийлашувига ҳамда алалоқибат бош вазирнинг истеъфосига олиб келган. 

5 май куни Туркия бош вазири Аҳмет Довудўғли ўз вазифасидан истеъфо берганини эълон қилган эди.