2017 йили Жазоирда 265 метр баландликдаги минорали масжид қурилади. Бу ҳақда The Guardian нашрига асосланиб РИА Новости хабар берди

“Бу масжид қурилиши экстремистларга қаттиқ зарба бўлади. Улар кўп йиллардан буён масжиднинг қурилишига қаршилик қилиб келмоқда”, - деди Жазоир қурилиш вазири масжид қурилиши учун масъул маслаҳатчиси Аҳмад Маданий.

Унинг сўзларига кўра, қурилиш ғояси 1962 йили Жазоирнинг Франциядан мустақилликка эришганида пайдо бўлган эди. 

Жамаа Эл-Жазоир масжиди, лойиҳага кўра, 120 минг намозхонни сиғдира олади. Унда Қуръонни ўқитиш мактаби, ислом санъати ва тарихи музейи ҳамда бир миллион китобга эга кутубхона жойлашади.  

Масжиднинг қад кўтариши учун 1,4 миллиард доллар миқдорида пул сарфланади. Бироқ экспертлар лойиҳанинг муваффақиятига шубҳа билдиришди. Уларда Жазоир шаҳри сейсмик хатарли ҳудудда жойлашгани хавотир уйғотмоқда. 2003 йилда содир бўлган сўнгги зилзила тахминан 3 минг кишини ҳаётдан олиб кетган.

Минора - муаззиннинг (сўфи - масжид хизматчиси) намозхонларни ибодатга чақириш учун азон айтадиган жойи. Бундай миноралар масжиднинг асосий биноси яқинида ўрнатилади. Айни вақтда дунёдаги энг баланд минора Марокашнинг Касабланка шаҳридаги Ҳасан II масжидидаги минора ҳисобланади. Унинг баландлиги 210 метрни ташкил этади.