Мана  бир неча йиллардан бери афсонавий Дубай шаҳри ўзининг лол қолдирувчи архитектура қурилишлари ва ҳайратланарли лойиҳаларини яратишда давом этмоқда. Дунёдаги энг ҳашаматли ва ажойиб мухандислик лойиҳалари айнан шу ерда амалга оширилмоқда, десак муболаға бўлмайди.  Kleindeisnt дизайнерлик гуруҳининг навбатдаги меъморчилик лойиҳаси ўзининг оригиналлиги ва ҳашамдорлиги билан бошқа мегаполислардан қолишмайди. Унинг ажралиб турувчи жиҳати – бино ерда эмас, Форс кўрфазининг устида қурилади.

Мажмуада 42та “Денгиз отлари” деб ном олган сузувчи вилла мавжуд бўлиб, улар бир қанча юзлаб сунъий ороллардан иборат инсон қўли билан яратилган “Дунё” архипелаги таркибига киради. 

Бино олға ҳаракатланувчи сузиш платформасида жойлашган. Ҳар бир денгиз отининг оғирлиги 200 тоннагача бўлиб, турар-жой майдони 372 кв.метрни  ташкил этади. Шунингдек, бино эгасининг эҳтиёжларига мослаштирилган 3та қават мавжуд бўлиб, улардан биринчиси сув остида жойлашган бўлади. Шишадан ясалган деворлар океан ва денгиз маржонлари боғининг тароватидан баҳра олишга ёрдам беради.