Хитойнинг энтомология музейи ходими Чжао Ли томонидан топилган улкан таёқчасимон қўнғиз (палочник) узунлиги 62,4 см ни ташкил қилиб, у дунёдаги энг катта ҳашарот деб топилди. Янги ҳашарот тури унинг биринчи кашфиётчиси номига Phryganistria chinensis Zhao деб аталди. 

Чжао Ли катта ҳашаротни 1998 йилдан бери қидириш билан шуғулланган. Ўшанда Гуанси вилоятида яшовчи аҳоли унга ярим метрлик, танаси қалинлиги катта одамнинг кўрсаткич бармоғи қалинлигидек келадиган катта ҳашаротни кўришганини айтишган.

Олим бундай ҳашарот бўлиши мумкинлигини истисно қилмаган, бироқ у бу ҳашаротни фақатгина 2014 йилда топишга муваффақ бўлган. "Мен Гуанси тоғидаги Лючжоу шаҳри атрофида 2014 йил 16 август тунги пайт ҳашаротлар йиғиб юрганимда, ёғоч қўнғизига ўхшаш шарпани кўрдим. Мен унга яқинлашганимда ҳайратдан ёқамни ушлаб қолдим: мен кўрганим қўнғизнинг ўзи эмас, фақатгина панжасининг ўзигина бўлган", деб олимнинг сўзларини келтирмоқда "Синьхуа" ахборот агентлиги. 

Топилган ҳашаротнинг узунлиги 62,4 см ни ташкил қилган. Аввалги рекорд 2008 йилда Малайзияда аниқланган худди шу турдаги ҳашаротга тегишли бўлганди, унинг узунлиги 56,7 см бўлган. 
Бироқ янги рекорднинг расман тан олиниши учун яна 2 йил талаб этилди. Бундан ташқари, топилган ҳашарот шундай катта ўлчамларга мойиллиги борлиги аниқланган: Чжао бу ҳашарот қўйган 6 та тухумни олиб, улардан зурриёт чиқишини пойлаган ва улардан энг кичигининг ўлчамини ўлчаганда унинг узунлиги 26 см ни ташкил қилган.

Ҳозирда ҳаммаси бўлиб таёқчасимонларнинг 3 мингга яқин тури очилган.