Охирги 12 йил давомида кўзи ожиз бўлиб қолган 70 ёшли америкалик аёл Мэри Энн Франко Жанубий Флоридадаги ўз уйида йиқилиб кетгани сабабли яна кўришни бошлади, деб ёзмоқда Sky News.

Бу ерда "Бахтсизлик бўлмаганда бахт бўлмасди" деган русча мақоли яна бир карра ўз исботини топди.

"Эрталаблари мен уйқудан турганимдан кейин, қуёш нурларининг дарахтлар орасидан ўтаётганини кўрмоқдаман. Буни кузатиш жуда ҳаяжонлидир", деб айтмоқда аёл.

Аёл 1995 йилда юз берган автофалокат оқибатида умуртқасидан жароҳат олиши туфайли кўриш қобилиятидан маҳрум бўлиб қолганди. Аёл йиқилгандан сўнг эса бўйнини шикастлаб олди ҳамда қўли ва белидаги оғриқни енгиллаштириш учун операция қилинди. Операциядан кейин аёлга кўриш қобилияти қайтди.  

"Мен ҳеч қачон бундай ҳолатни кўрмагандим. Эҳтимол, қўшимча қон оқими кўриш қобилиятининг тикланишига ёрдам берган. Бироқ бу назарий жиҳатдан шундай", деб таъкидлаб ўтди аёлни операция қилган нейрожарроҳ Жон Афшар.

Нашрнинг таъкидлашича, аёл операциядан кейин шунингдек фалокатгача азият чеккан дальтониклик (ранг ажрата олмаслик) қусуридан ҳам фориғ бўлган.