Венесуэлада мухолифат етакчиларидан бири – "Янги замон"  партияси етакчиси Херман Маваре отиб кетилди.

Excelsior портали маълум қилишича, 6 май эрта тонгда Лара штатидаги Баркисимето шаҳрида мухолифатчи бошига ўқ узилган. У олинган жароҳатдан шифохонада вафот этган. Маваренинг партия бўйича ҳамкасби унинг бошига мотоциклда кетаётган кимса ўқ узганини маълум қилган. Қотил ўқ узишдан олдин сиёсатчининг исми қандайлигини сўраган.

Шуниси маълумки, аввалроқ муҳолифатчига бир неча бор унинг иши билан боғлиқ таҳдидлар қилинган. Расмий ҳукумат Маваренинг қотиллигига ҳеч қандай изоҳ бермади.

Ўтган йилнинг ноябрида парламент сайловларидан олдин "Демократик ҳаракат" партиясининг етакчиларидан бири Луис Мануэль Диас Гуарико штатида овоз берувчилар билан учрашув вақтида отиб кетилганди.

Аввалроқ Венесуэлада мухолифат Миллий сайлов кенгашига мамлакат президенти Николас Мадуронинг истеъфога кетиши бўйича референдум ўтказиш учун 1,85 млн имзо қўйилган талабни юборган эди.

Ҳозирда Венесуэла нефть нархи пасайиши сабабли оғир иқтисодий инқирозни бошидан кечирмоқда. Хусусан, жорий ҳафтада иқтисод қилиш мақсадида бюджет ичшилари учун ишчи ҳафтаси 2 кунгача қисқартирилди.