Қутқарувчилар Кения пойтахти Найробида қулаган бино жойида қидирув-қутқарув ишларини якунладилар. Қурбонлар сони 49 кишини ташкил қилди, деб хабар берди Кения табиий офатлар оқибатларини бартараф этиш миллий бошқармаси бошлиғи Пиус Масаи.

29 апрелда Найробининг туманларидан биридаги 6 қаватли бино қулаб тушганди. Дарё ёнида жойлашган уйнинг 1-қавати кучли ёмғирлар ва тошқин оқибатида сув остида қолганди ва дастлабки маълумотларга кўра, айнан шу ҳолат бинонинг қулашига олиб келган.

Аввалроқ 43 киши ҳалок бўлгани маълум қилинганди. 

Масаининг айтишича, бино вайроналари остидан 140 киши қутқариб олинган, улар орасида фожиа юз бергандан 4 кун ўтиб аниқланган 7 ойлик қизча ҳам бўлган. Яна 47 киши бедарак йўқолган ҳисобланмоқда, улар фожиа пайтида бинода бўлган-бўлмаганликлари ҳам номаълум.