Англиянинг "Лестер" клуби бош мураббийси Клаудио Раньери ўтган мавсумнинг италиялик энг яхши мураббийси деб топилиб, унга 5 минг евро мукофот пули тайинланганди. У бу пулларни Стефано Боргоново номидаги амиотрофик склероз билан курашувчи фондга тақдим қилади. Бу ҳақида Football Italia портали маълум қилди. 

Боргоново - италиялик футболчи, 1989-1990 йиллар Чемпионлар кубоги ҳамда "Милан" таркибида 1989 йилги УЕФА суперкубоги соҳиби. Боргоново 2013 йилнинг июнида 49 ёшида вафот этди. Ҳаётининг сўнгги йилларида у амиотрофик склероздан азоб чеккан ва бутунлай шол бўлган. 

"Мураббий Раньерининг Беарзот мукофотини Стефано Боргоново номидаги хайрия фондига топшириши биз учун кутилмаган ёқимли янгилик бўлди. Биз мураббийнинг отам ва унинг касаллик билан курашганини ёдга олганидан жуда хурсандмиз. Раньери отамиз хаста пайтларида ундан хабар олган ва доимо қўллаб-қувватлаган. Фондимизни қўллаш қарори у учун нафақат майдондаги воқеалар, балки ундан  ташқаридаги ишларнинг ҳам муҳимлигидан далолат беради", - деди Боргоновонинг қизи Алессандра, фонд асосчиларидан бири.

9 Май куни Рим шаҳрида Италия футбол федерацияси (FIGC) томонидан ўтган мавсумнинг энг яхши мураббийсига топшириладиган Энцо Беарзот мукофотини топшириш маросими бўлиб ўтади. Бу йил ушбу нуфузли мукофот "Лестер" жамоаси билан Англия чемпионатида ғалабага эришган Раньерига насиб этди. 

Ушбу мукофот Раньерининг биринчи чемпионлик мукофотидир. Унга қадар 64 ёшли италиялик мутахассис Испания ("Валенсия", "Атлетико"), Италия ("Парма", "Ювентус", "Рома", "Интер", Фиорентина", "Наполи", "Кальяри"), Франция ("Монако"), Англия ("Челси") чемпионатларида фаолият кўрсатган, аммо ҳеч бир жамоада миллий биринчиликни қўлга киритмаган.