Шимолий Корея ядровий қурол-аслаҳа эга масъулиятли давлат сифатида "ядровий қурол-аслаҳани тарқатмаслик бўйича ўз мажбуриятларини бажаради", деб айтди Шимолий Корея етакчиси Ким Чен Ин Пхеньянда бўлиб ўтаётган Корея Меҳнат партиясининг 7-қурултойида. Бу ҳақда ТАСС ахборот агентлиги хабар бермоқда.

Ким Чен Ин мамлакат "ядровий қуролни худди шундай қуролга эга душман тажовузкор кучлари томонидан суверенитети бузилсагина ишлатиши мумкинлигини" таъкидлаб ўтди.

Шимолий Корея етакчиси Шимолий Корея ҳукумати ва Меҳнат партияси "ҳаттоки ўтмишда Шимолий Кореяга душманларча муносабатда бўлган, бироқ эндиликда мамлакатнинг мустақиллигини ҳурмат қилувчи" барча давлатлар билан муносабатларни нормаллаштириш ва ривожлантиришга тайёрлигини маълум қилди.

"Шимолий Кореянинг бошқа давлатлар билан муносабатлари мамлакатни яккалаб, уни бўғмоқчи бўлаётган АҚШ ва унинг тарафдорларининг душманларча сиёсатига қарамасдан ривожланиб борган", деб айтди Шимолий Корея етакчиси.

Таъкидланишича, Ким Чен Ин Шимолий Корея ва Жанубий Кореянинг бирлашиши бўйича аниқ топшириқлар қўйди ва "партия томонидан мамлакатларни бирлаштириш бўйича анчагина ишлар қилинганини" таъкидлаб ўтди.

Ким Чен Ин март ойида Шимолий Корея ўзининг баллистик ракеталарини ядровий зарядлар билан жиҳозлай олишга қодирлигини айтганди ва АҚШга ядровий зарба бериш билан таҳқид қилганди. Шимолий Корея аввалроқ водород бомбасининг синовдан ўтказилишини мамлакатининг АҚШ ва унинг тарафдорлари келтириб чиқариши мумкин бўлган ядровий уруш таҳдиди олдида "ўзини ҳимоя қилишга ҳаракати" деб айтганди.