Боливия президенти Эво Моралеснинг маълум қилишича, қўшни мамлакат Чили ўзаро чегара ҳудудига ҳарбий база жойлаштирган ҳолда Боливияга таҳдид солмоқда.

Моралеснинг айтишича, ўзаро чегара чизиғидан 15 км масофада ҳарбий база яратилиши Боливияга қарши агрессив акт ҳисобланади. У халқаро нормаларга кўра қўшни давлатнинг ҳарбий базаси чегарага 50 км масофагача яқин жойлаштирилмаслиги ҳақида эслатиб ўтган.

Чилиликларнинг ҳарбий базаси Силала дарёси бўйида бўлиб, сув ресурслари икки давлат ўртасида узоқ йиллардан буён мунозараларга сабаб бўлиб келади. Силала дарёсининг манбаи Боливия ҳудудида жойлашган, лекин унинг асосий қисми Чили ҳудудидан оқиб ўтади.

Бундан ташқари, Боливия денгизга тўғридан-тўғри чиқиш имконига эга бўлиш учун уриниб келади.

Бундан олдинроқ, Боливия ҳукумати Чилини Ҳаага халқаро судига берган, унда 19 асрдаги Иккинчи Тинч океани уруши вақтида Чилига бой берилган, океанга олиб чиқувчи ҳудуд қайтарилишини талаб қилганди.

19 аср охиридаги қуролли тўқнашувлар натижасида Боливия океан бўйидаги 400 километрлик қирғоқни йўқотган.