Буюк Британиянинг Rasa водородли экомобилини ишлаб чиқарган Riversimple компанияси яна икки модель яратиш ниятида. Бу ҳақида Autocar нашри маълум қилди. 

Икки янги модель ҳам Fiat 500 дизайни яратувчиси Крис Райтц ишлаб чиқарган биринчи Riversimple услубида бажарилади. Биринчи модель Citroen DS'ни эслатувчи шаклдаги седан бўлиши кутилмоқда. Иккинчиси эса - ёпиқ ғилдираклар ва аэродинамик кузовли унча катта бўлмаган фургон.

Оғир вазни туфайли уларнинг ҳаракатланиш захираси Rasa моделига қараганда камроқ бўлади, Rasa ёнилғини қайта тўлдиришсиз 483 километргача ҳаракатлана олади. 

Икки ўринли Riversimple Rasa автомобили 2016 йилнинг февралида кенг оммага намойиш қилинган эди. Модель алюминий ромости ва шиша толали кузов панелига эга углепластик монококда қурилган. Машинанинг оғирлиги - 580 килограмм.

Rasa тўртта электромотор билан бойитилган (ҳар бир ғилдиракда биттадан). Энергия водород ва кислород ўртасидаги кимёвий реакция натижасида ишлаб чиқарилади. 

Экомобиль 10 сонияда нолдан 96 километр/соатгача тезлашишга қодир. Максимал тезлик ҳам соатига 96 километр билан чегараланган.

2016 йилнинг охирига яқин Riversimple 20та серияолди машиналарининг "бета-синови"ни йўлга қўяди. Синовлар 2017 йилда ҳам давом эттирилади. Автомобиллар сотуви эса бир йил кейинга режалаштирилмоқда.