Аслам жияни Москвада ишлаётгани, мўмайгина пул топаётгани ҳақида айтиб, кимдир Россияга бормоқчи бўлса ёрдам қилишини айтди. Наврўзбек отаси билан маслаҳатлашиб, ишга боришга қарор қилди ва ҳамқишлоғи Асламнинг уйига бориб, Москвага ишга боришини, аммо пули йўқлигини айтди. Бу ҳақда “Ҳуқуқ” газетаси ёзмоқда.

Аслам Наврўзбекка хавотир олмаслигини, у ерда ишлаганидан сўнг пулни қайтариши мумкинлигини айтиб, унинг паспортини олиб қўяди. 

Ваъда қилганидек, Аслам бир неча кундан сўнг Наврўзбекка паспорти ва чиптани олиб келди. Бу аслида жиноий режанинг дастлабки босқичи бўлиб,  Россиядаги Пўлатнинг тоғаси Аслам ва унинг ўғли Насимларнинг ўзаро келишуви эди. Улар ишлашга бориш истагида бўлган фуқароларга “ойига 700-800 доллардан оласизлар, агар шароитингиз бўлмаса чипталарни ўзимиз олиб берамиз”, деган ёлғон ваъдалар билан кўпчиликни тўплади. 

Улар Наврўзбек ва унга ҳамроҳ бўлган Жасур, Жуманиёз, Одил, Олим, Сирожиддин ва Русланларга “Самарқанд-Москва” йўналишидаги самолётга билет олиб, жўнаб кетишларига ёрдам берди. У ерда уларни Пўлатнинг укаси кутиб олиб, ўша куннинг ўзидаёқ қурилишга олиб борди. Паспортларини эса “рўйхатдан ўтказаман”, деган ёлғон билан олиб қўйди. Не-не умидлар билан келган йигитларнинг оғир дамлари бошланди. Пўлат “Қурилишни тезроқ тугатиш керак”, деб ҳатто уларни дам олишига рухсат бермади. Қурилиш бўлаётган бинони россияликлар қўриқлар, ишчиларнинг бинодан ташқарига чиқиши, дам олиши мумкин эмасди. Телефон қилганда ҳам қўриқчилар ёнида туриб, “ҳаммаси яхши” деб айтишга мажбур қилишарди. Бир йилга яқин вақт мобайнида йигитлар ана шундай шароитда ишлашга мажбур бўлишди. Пўлат эса паспортларни “йўқотиб қўйдим”, “ишни тугатсаларинг ойлик бераман”, деган ёлғон баҳоналар билан кунларни ўтказаверди. 

Алданганликларини билган Наврўз ўша ердаги Ўзбекистон элчихонасига бориб, паспорти йўқолганлигини ва уйига қайтишга ёрдам беришларини сўраб мурожаат қилди. 
Шундан сўнг Ватанларига қайтган йигитлар ҳуқуқни муҳофаза қилувчи органларга мурожаат қилишди. Одамфурушлар бирин –кетин қўлга олинди. 

Суд ҳукми билан Пўлат Амриддинов 8 йил муддатга, Асламқул Ҳайдаров 5 йил-у 6 ой муддатга, Насим Ҳайдаров 5 йил муддатга озодликдан маҳрум этилди.