8 майда Стокгольм қироллик саройи "Евровидение" мусиқа танловига ўз қўшиқчиларини юборган 42 та давлат вакилларига ўз эшикларини кенг очди – бутун дунё мусиқа шайдолари сабрсизлик билан кутаётган танлов бошланди.

Қизил йўлакчада биринчи бўлиб танлов бошловчилари Петра Меде ва танловнинг ўтган йилги ғолиби ва унинг ғалабаси эвазига Швеция 6 маротаба ушбу танловни қабул қилаётган Монс Сельмерлев пайдо бўлдилар. Уларнинг ортидан танловнинг барча иштирокчилари юриб ўтдилар. 

Букмекерлар россиялик қўшиқчи Сергей Лазаревни танлов фаворити сифатида кўришмоқда. Бу орада Озарбайжон танловнинг сиёсийлашиб кетгани сабабли кейинги йилда унда иштирок этишни истамаётганини маълум қилди. Озарбайжоннинг бундай эътирозига Арманистоннинг танловда тан олинмаган Тоғли Қорабоғ республикаси байроғи бўлишини айтгани сабаб бўлган.

Бундан олдин таниқли швед гуруҳи АВВА музейида танловнинг тарихига бағишланган ""Good evening Europe" (Хайрли кеч, Европа) деб номланган кўргазма очилди. Кўргазмада мусиқа танлови ғолибларининг анжомлари ва костюмлари тақдим қилинган.  
Бу кўргазманинг очилишининг бош ташаббускори АВВА аъзоси Бьорн Ульвеус бўлди, чунки гуруҳ айнан 1974 йилда танловда ғолиб бўлгандан кейин оламшумул машҳурликка эришганди.