Япония хавфсизлик талабларининг кучайтирилиши сабаб яна бир ядро реактори тўхтатилди. Киодо агентлигининг хабар қилишича, у навбатдаги олтинчисидир. 

Агентликнинг маълумотларига кўра, Shikoku Electric Power компанияси Эхимэ префектурасидаги "Иката" АЭСнинг 40 йиллар муқаддам барпо этилган илк реактори хизматидан воз кечишга қарор қилган. Ушбу реакторни янги талабларга мослаштириш жуда қимматга тушиб, 1,59 миллиард долларлик маблағни талаб этар эди. Бунинг ўрнига, станциянинг бирмунча кучлироқ учинчи реактори янгиланади. Икатедаги реакторни демонтаж қилиш 30 йилга чўзилади. Шу мақсадда япон иенасининг ҳозирги курси бўйича 373 миллион доллар сарфланиши лозим бўлади. 

Япониядаги АЭСларга жорий этилган янги меъёрларга кўра, 40 йилдан аввал қурилган барча реакторлардан фойдаланиш мумкин эмас. Аммо, АЭС хавфсизлиги кучайтирилган тақдирда ундан яна 20 йил мобайнида фойдаланишга рухсат берилади. 

Япония ҳукумати 2030 йилга бориб Фукусима АЭС ҳалокатидан сўнг тўхтатилган реакторларни қайта ишга туширишга умид қилмоқда. Уларнинг фаолияти тўлиқ тикланса, мамлакатдаги электр энергиясининг 20 фоизи АЭСлар томонидан ишлаб чиқарилади. 

"Иката" АЭС биринчи реактори тўхтатилгач, Японияда уларнинг сони 42та қолади.