Мюнхеннинг «Бавария» жамоаси кун давомидаги иккинчи трансфер амалга оширилгани ҳақида маълумот берди. Жамоа расмий сайтида «Боруссия»дан ҳимоячи Матс Ҳуммельс трансфер қилингани ҳақида хабар берилди.

Мюнхенликлар клуби 27 ёшли футболчи билан 2021 йилнинг 30 июнигача битим тузган.

«Биз Матс Ҳуммельс «Бавария» фойдаси учун қарор қабул қилганидан хурсандмиз. Матс – дунёнинг энг яхши марказий ҳимоячиларидан бири, унинг ёрдамида биз жамоанинг даражасини янги мавқеига олиб чиқамиз», – дея трансферга изоҳ бериб ўтган «Бавария» директорлар кенгаши раиси Карл-Хайнц Румменигге. 

Томонлар футболчининг трансфер суммаси борасида очиқ маълумот бермасликка келишиб олишган.

Бундан олдинроқ дортмундликлар раҳбарияти вакили Ханс-Йоахим Ватцке футболчининг мюнхенликлар жамоаси сафига ўтишни истаётгани, унинг трансфери қиймати тахминан 35-38 млн евро бўлиши ҳақида хабар берганди. 

Жорий мавсумда Ҳуммельс бундеслиганинг 29 учрашувида майдонга тушиб, 2та гол урди ва 2та голли узатма муаллифи бўлди.