Кувайтда ДНК-таҳлилнинг мажбурийлиги тўғрисида қонун қабул қилиниши кутилмоқда. Маълум қилинишича, бунга рози бўлмаганларни йирик жарима тўлови ёки бир йиллик қамоқ жазоси кутади.

Кувайтнинг барча аҳолиси ҳамда бу мамлакатга ташриф буюрувчилар ДНК-таҳлили топширишига тўғри келади, унинг натижаларидан терроризм билан курашиш бўйича маълумотлар банкини яратишда фойдаланилади. Бу ҳақида Science Alert! хабар берди

Барча фуқаролардан ДНК намуналарини олиш мақсадида ҳукумат бир неча мобил марказларни бунга жалб этишни режалаштирмоқда: Кувайтда тўрт миллиондан ортиқ аҳоли яшайди, уларнинг 75 фоизи - хорижликлар. Хориждан келганлар самолётдан тушиши билан аэропортда ДНК-таҳлил (қон ва сўлак намунаси) топширади.

ДНК-тестдан бош тортганларни 33 минг доллар миқдорида жарима тўлови кутмоқда. Жаримадан бош тортганларга эса бир йиллик қамоқ жазоси тайинланади. 

Ҳукуматнинг бу қарори амалда тўлиқ қўлланса, Кувайт барча аҳолиси ДНК-таҳлил топширадиган биринчи мамлакат бўлади. 

Ҳукумат вакилларининг ишонч билдиришича, мазкур маълумотлар базасидан бирорта маълумот ташқарига чиқса, қатъий жазо муқаррар, қонунбузарни 7 йилга озодликдан маҳрум қилишлари мумкин.