"Лестер" жамоаси футболчилари клуб хўжайини Вишая Шривадданапрабхадан мавсум чемпионлигини казинода нишонлаш учун 10 минг фунтдан мукофот олган. Бу ҳақда The Daily Mirror хабар тарқатган.

Қайд этиш керакки, Шривадданапрабха бундан аввал ҳам бир неча марта ўз сахийлигини намойиш этганди.

Мавсумнинг 32-турида, "Саутҳемптон"га қарши учрашув арафасида Шривадданапрабханинг туғилган куни муносабати билан майдонга ташриф буюрган мухлисларнинг ҳар бирига 1 бутилкадан пиво ёки сув ҳамда ширинликлар тарқатилганди.

36 турдан кейин, "Челси" ва "Тоттенҳэм"нинг ўзаро ўйинида 262 ҳисобида дуранг қайд этилиши эвазига муддатидан олдин мавсум чемпионига айланган жамоа футболчиларининг ҳар бирига мукофот тариқасида "Мерседес" автомобиллари берилди. Шунингдек, жамоа футболчилари таътил вақтида Лас-Вегасга саёҳат қилиши ташкиллаштирилади.

Мавсум якунларига кўра, "Лестер" 93 млн фунт стерлинг (136 млн доллар) маблағ ишлаб олади. Шундан 54 млн фунтлик қисми ўйинларнинг  телетрансляцияси ҳуқуқлари сотилиши эвазига, 14 млн фунт эса Sky ва BT Sport телекомпанияларидан жамоанинг 16 учрашувини телевидение орқали намойиш этганлик учун, шунингдек 25 млн евро турнирдаги ғалаба бонуси сифатида олинган.

"Лестер" мавсумнинг охирги ўйинини 15 май куни сафарда "Челси"га қарши ўтказади.