Туркия прокуратураси россиялик учувчининг тахминий қотили — Алпарслон Челикдан барча айбловларни олиб ташлаган. Бу ҳақда прокуратурадаги манбасига асосланган ҳолда Daily Sabah хабар тарқатган.

Бундан олдинроқ, 9 май куни Челикнинг адвокати Мурот Устунтоғ прокуратура Челикка айбловлар илгари сурмаётгани ҳақида маълум қилганди.

"Ҳимоячимни айблаш учун асослар етарли эмас, деб топилгани учун, Туркия ҳукумати ундан айбларни олиб ташлашга қарор қилди", — деган у.
Шу билан бирга, Челикнинг ноқонуний равишда қурол сақлаши ва олиб юриши юзасидан тергов ишлари давом этаётганини айтиб ўтган.

Эслатиб ўтамиз, Туркиянинг F-16 русумли ҳарбий қирувчи самолёти 2015 йилнинг 24 ноябрида Сурия ва Туркия ҳаво чегарасини бузиб ўтишда айблаб Россиянинг Су-24 русумли бомбардимончи самолётини уриб туширди. Учувчилар катапульта қилинган, аммо асосий учувчи Олег Пешков ҳудуддаги туркман жангчилари томонидан ердан туриб ўққа тутилган. Иккинчи учувчи асирга олинган, кўп ўтмасдан Сурия ҳукумати ҳарбийлари ёрдамида у озод қилиниб, Хмеймимга қайтарилганди.

Орадан кўп ўтмай Алпарслон Челик ўзининг ушбу қотилликка алоқадорлиги ҳақида оммага маълум қилган эди.

Апрель ойи бошида Челик Туркия ғарбидаги Измир шаҳрида ноқонуний равишда қурол сақлаш ва олиб юришда айбланиб, ҳибсга олинганди. Тергов давомида Челик жангарилар гуруҳи бошлиғи сифатида ушбу ҳодиса учун масъулиятни ўз зиммасига олганини, шахсан ўзи россиялик ҳарбий хизматчини ўққа тутмаганини ва бу борада ҳеч қандай буйруқ бермаганини маълум қилди.