Motherboard портали журналисти Симона Гертс (Simone Giertz) кунлик маиший амалларни енгиллатишга хизмат қилувчи роботлаштирилган мосламалар ўйлаб топиши билан машҳур.

Унинг сўнгги ихтироси – бош ювувчи робот қўл. Мослама ички аккумулятор, Arduino Uno аппарат платформаси ва иккита сервопривод ҳисобига ишлайди. Улардан бири идишдан шампунь сиқиб чиқаради, иккинчиси робоқўлни ҳаракатга келтиради. Робоқўл сочда шампунни кўпиртиришга уринади. 

Таклиф этилган усул тонгги ювиниш маросимларига сарфланадиган вақтни тежаб қолишга имкон беради, демак, ишга ёки муҳим учрашувга кеч қолиш хавфини камайтиради. 

Ҳар доимгидек, ушбу ихтиро мукаммалликдан анча йироқ. Бироқ Симонанинг роботлаштирилган ёрдамчиларини ҳазил билан тақдим этиши жараённи қизиқарли бўлишини таъминлаган.