Франция ҳукумати ҳозирда амалда бўлган, АҚШдан сланецли газ импорти тақиқловига эҳтиёж қанчалик зарурлигини таҳлил қилмоқда. Бу айни вақтда Францияда гидроёриш йўли билан фойдали қазилмаларни олишга тақиқлов амал қилиши билан боғланган ва бу тақиқлов 2017 йилгача давом этади. Бу ҳақда Франциянинг экология, барқарор ривожланиш ва энергетика вазири Сеголен Руаяль маълум қилди, деб хабар бермоқда Reuters ахборот агентлиги.  

Бу муаммони батафсил ўрганиш ҳақидаги қарор Франциянинг Engie ва EDF компаниялари АҚШдан газ импорт қилишга келишиб олганларидан кейин қабул қилинди. Шартномаларда суюлтирилган табиий газ етказиб беришда сланецли газ улуши умумий ҳажмдан 40 фоизгача етиши кўзда тутилган.

"Мен иккала компаниядан улар нима учун ҳушёрлик кўрсатмаганликлари ҳақида сўрадим ҳамда сланецли газни импорт қилишга тақиқловнинг ҳуқуқий асосини топишни сўрадим", деб айтди вазир.

The Local нашрининг маълум қилишича, АҚШ сланецли гази Франция шимолидаги Дюнкерк порти терминалига етказилади. Биринчи етказмалар 2016 йил ёзидаёқ бошланади. Етказмаларнинг умумий ҳажми 50 та йирик танкердан ошиши керак.

Компаниялар шартнома қиймати ва ҳажмини ошкор этишмаяпти, бироқ L'Express нашри маълумотларига кўра, EDF сланецли газни етказиб бериш бўйича 20 йиллик шартнома имзолаган. Унга кўра компания учун етказиб бериладиган газ ҳажми йилига 1 млрд куб метрни ташкил қилади.