Хитой ҳукумати 2018 йилгача мамлакат транспорт инфратузилмаси иншоотларини барпо этиш мақсадида 4,7 трлн юань (721 млрд АҚШ доллари) сармоя киритади, деб хабар қилмоқда "Цзинцзи цанькао бао" нашри.

"Ушбу маблағлар, биринчи навбатда, темир ва автомобиль йўллари, денгиз кўприклари ҳамда аэропортлар барпо этишга сарфланади", - деб ХХР ислоҳотлар ва тараққиёт давлат қўмитаси қароридан иқтибос келтиради газета. 

Ҳужжатда қайд этилишича, Хитой ҳукумати нафақат мамлакат ичида балки бошқа давлатлар билан ҳам транспорт алоқасини ривожлантиришни режалаган. 

Таъкидлаш керак, Хитой транспорт соҳасида темир йўллари муҳим аҳамият касб этади. 2015 йилда Хитой поездлари 2,5 млрд йўловчини ташиган - бу бир йил аввалги қўрсаткичдан 10 фоизга кўп демакдир. 

Умуман, 2015 йилнинг 11 ойида Хитой транспортида ўсиш 4,3 фоизни ташкил этган, 41 млрд тонна юк ташилган. Бунга, биринчи навбатда, автомобиль транспорти воситасида ташилган юк ҳажмининг 6,2 фоизга ўсиб, 32,2 млрд тоннани ташкил этгани катта ҳисса бўлиб қўшилган. Авиаташувлар воситасида 5,66 млн тонна юк ташилиб, ундаги ўсиш 5,2 фоиздан иборат бўлган.