Япониянинг энг йирик автомобилсозлик компанияси ҳисоботида маълум қилинишича, Toyota Motor автоконцерни ва унинг таркибига кирувчи шўъба корхоналарининг ўтган 2015 молия йилидаги (2016 йил мартида якунланган) соф даромади йиллик ифодада 6,4 фоизга ўсиб, 2,31 трлн иенани (21,3 млрд АҚШ доллари) ташкил этган. 
Корпорация маълумотларига кўра, бундай ижобий натижа миллий валюта иена курсининг долларга нисбатан пастлиги ва хорижий мамлакатлардаги савдоларнинг юқори кўрсаткичи билан изоҳланади. 

"Шубҳасиз, иенанинг расмий курси биз учун ижобий таъсир этди, бироқ бу йил вазият тубдан ўзгарди", - деган компания президенти Акио Тоеда матбуот анжуманида.
Toyota ва шўъба корхоналарининг савдо кўрсаткичи йиллик ҳисобда 4,3 фоизга ўсиб, 28,4 трлн иенани (261,8 млрд доллар) ташкил этган. Бундан аввалроқ, япон автогиганти 2015 молия йилидаги соф даромади 2,8 трлн иенадан (25,8 млрд доллар) иборат бўлишини башорат қилган эди. 

Шуни ҳам алоҳида қайд этиш керакки, Toyota тўртинчи йилки дунёнинг энг йирик автомобиль сотувчиси мақомини сақлаб қолди. У жаҳон бўйлаб, 10,15 миллион дона машина сотишга муваффақ бўлган. Аммо 2016 йил бошидан бери компания бир неча маротаба ишлаб чиқаришини тўхтатишга мажбур бўлди. 

Хусусан, пўлат қуювчи заводлардан бирида рўй берган ёнғин ҳамда Кюсю оролида бир неча марта содир бўлган кучли ер силкинишларидан сўнг, автомобиль ишлаб чиқариш вақтинча тўхтатилган эди. Бундан ташқари, иена курси қарийб 10 фоизга мустаҳкамланди. 

Шу сабабли, компания тахминларига кўра, унинг 2016 молиявий йилидаги соф даромади 35 фоизга тушиб, 1,5 трлн иенани (13,8 млрд доллар) ташкил этиши мумкин.