Туркия шимоли-ғарбидаги Кўчали вилоятидаги колониялардан биридан ИШИДга аъзоликда гумон қилиниб қўлга олинган 5 нафар маҳбус қочиб кетган. Бу ҳақда Hurriyet хабар тарқатди.

Манбанинг ҳуқуқни муҳофаза қилиш органларига асосланиб хабар қилишича, бу шахслар Сурия билан чегара ҳудудида қурол савдоси амалга оширганликда ва ИШИДга алоқадорликда гумон қилиниб қўлга олинганди. Махсус хизматлар бу жиноятчиларнинг қочиб кетиши мумкинлигидан огоҳлантирган бўлсада, улар қамоқхонадан қишлоқ ҳудудидаги кичик колонияга ўтказилган ва шундан кейин улар қочиб кетган.

Охирги маълумотларда қочоқлардан 3 нафари қўлга олингани, яна иккисини қидириш ишлари давом этаётгани маълум қилинган.