Украина Олий Радаси халқаро ҳамжамиятга мурожаат этиб, 1944 йилда қрим-татарларининг ватанларидан кўчирилишини геноцидга тенглаштириш ва Россия суди томонидан қрим-татарлар Мажлисининг Қримдаги фаолиятини тақиқлаш тўғрисидаги қарорини қоралашни сўрамоқда

Олий Раданинг 11 май куни эрталабки мажлисида БМТ, Европарламент, ПАСЕ, ЕХҲТ парламент ассамблеяси, жаҳон етакчиларига қарата қрим-татарларига нисбатан геноцид уюштирилганини тан олишни сўраб қилган мурожаатини 240 нафар халқ депутати маъқуллаган. 

Олий Рада, шунингдек, РФдан "Украина суверен ҳудудининг ажралмас қисми бўлган Қримдаги фуқаролар ва инсон ҳуқуқлари, хусусан, тубжой аҳолиси ҳисобланувчи қрим-татарларининг ҳақларини поймол этмасликка чақирган".
Украина парламенти жаҳон етакчилари ва жамоат арбобларини "РФ томонидан қрим-татарларининг камситилиши ва таъқиб қилинишига чек қўйишда зарурий саъй-ҳаракатларни амалга ошириш"га чақирган.

Шунингдек, Рада давлатлар ва халқаро ташкилотларни 18 май куни қрим-татарлари кўчирилиши қурбонлари хотираси муносабати билан ўтказиладиган маросимда иштирок этишга чақирган.