15 йилдан буён Ўзбекистон президентининг махсус фармонига мувофиқ ҳар йили май ойининг учинчи якшанбаси кончилик ва металлургия саноати ходимлари куни сифатида кенг нишонлаб келинади.

Шу муносабат билан Навоий кон-металлургия комбинати жамоаси санани муносиб кутиб олиш мақсадида, ўтган йиллар давомида соҳада амалга оширилган ишлар сарҳисобини эълон қилди.

Хусусан, комбинат улкан бунёдкорлик ва иқтисодий юксалишлар йўлини босиб ўтди. “Модернизация-юксак самарадорлик омили” мавзусидаги матбуот анжуманида комбинат томонидан амалга оширилган бу йўналишдаги тадбирлар, истиқболли лойиҳалар самараси ҳусусида маълумот берилди.

Ҳозирги кунда қарийб 60 минг нафар турли касб эгалари меҳнат қилаётган комбинат қудратли ишлаб чиқариш объектлари ва ўз инфратузилмасига эга гигант корхона ҳисобланади.

"Мамлакатимиз иқтисодиётида етакчи мавқега эга бўлган комбинатда энг замонавий техника ва технологиялар билан жиҳозланган гидрометаллургия заводлари, қизилқум фосфорит мажмуаси, «Гужумсой», "Аристантау" олтин конлари, «Суграли», "Истиқлол" каби уран конларидан фойдаланилади. Комбинатда асосий ишлаб чиқариш кўрсаткичлари буйича барча режалар мунтазам бажариб келинаяпти",  дейди Навоий кон-металлургия комбинати инвестиция департаменти бўлими бошлиғи Абдулла Ҳурсанов.  

Унинг айтишича, шунингдек, кон-металлургия саноатини ривожлантириш мақсадида ҳукумат томонидан маъқулланган истиқболли лойиҳалар ўз самарасини бермоқда. Масалан, ўтган йилги Инвестиция дастури доирасида умумий қиймати 245 миллион доллардан ортиқ, маблағ эвазига 10та лойиҳа фойдаланишга топширилди. Жорий йилдаги Инвестиция дастури доирасида эса комбинат буйича умумий қиймати 963,8 млн доллар ҳажмида 20та лойиҳа киритилиб, 182,4 млн доллар инвестициялар ўзлаштириш кўзда тутилган. Бундан ташқари, дам олиш масканлари қурилиши, "Она ва бола" скрининг маркази барпо этилиши, сув билан даволаш профилаторийсини ишга тушириш тадбирлари ҳам бошлаб юборилган.