Япониянинг Nissan Motor автомобилсозлик компанияси Mitsubishi Motors’нинг 34 фоиз акциясини харид қилиш бўйича музокаралар олиб бормоқда. Мазкур битим имзолангудек бўлса, Nissan Mitsubishi Motors’нинг бош акционери бўлади. 

Унинг нархи 200 миллиард иенага (ҳозирги курс бўйича 1,8 миллиард доллар) баҳоланиши мумкин. Bloomberg’нинг маълум қилишича, Nissan рақибининг 33 фоиз акциясини сотиб олиши эҳтимол. Унинг бозор нархи 1,5 миллиард долларга яқин туради.

Япон ОАВда Mitsubishi Motors директорлар кенгаши Nissan назоратига ўтиш борасида бир тўхтамга келгани ҳақида хабарлар пайдо бўлган. Nissan раҳбарияти эса таклифни 12 май куни кўриб чиқади.

Bloomberg манбаларининг таъкидлашларича, Mitsubishi’да ҳисса сотиб олиш имкониятини бошқа компаниялар, хусусан, Пекиннинг BAIC Motor компанияси ҳам кўриб чиқмоқда. Mitsubishi Motors билан боғлиқ ёқилғи можароси ушбу савдолар эҳтимолига сабаб бўлмоқда.

Маълумки, 20 апрель куни компания раҳбарияти Япония транспорт вазирлигига топширган мурожаатида, автоконцерн кичик литражли автомобиллар ёқилғи сарфига оид синов жараёнлари натижаларини қалбакилаштирганини тан олган эди. 
Келгуси кун Япония ҳукумати Mitsubishi Motors’нинг Окадзакидаги бош қароргоҳида текширув ўтказганди. Бунинг натижасида Mitsubishi акциялари қиймати 40 фоиздан кўпроққа тушиб кетди.