eBay интернет дўконида «Лестер» жамоаси ўз ўйинларини ўтказадиган «Кинг Пауэр» стадиони ҳавоси сотивга қўйилди.

Айни вақтда 10та 1 литрли идишлардаги ҳаво сотувга қўйилган, улардан бири ўз харидорини топган.

«Кинг Пауэр» стадионидаги янги ҳаводан баҳра олиш имкониятини қўлга киритинг. Ғалаба ҳавосини сотиб олиш имконияти ҳаётингиз давомида бир марта бўлиши мумкин», — дейилган аннотацияда.

1 литр ҳаво нархи 30 фунт стерлинг (43,36 доллар).

2 май куни «Лестер» жамоаси ўзининг энг яқин таъқибчиси «Тоттенҳэм» «Челси»га қарши дерби баҳсида очко йўқотгач, 132 йиллик тарихида илк марта Англия чемпионига айланганди.

2015 йилнинг мартида eBay аукционида америкалик поп-қўшиқчилар концертларидан олинган ҳаво сотила бошлаганди.

Ўтган йилнинг декабрида эса Канада Пекин аҳолисига тоза ҳаво сота бошлади. 

Дастлаб Vitality Air компанияси eBay орқали ҳаво пакетларини 0,99 доллардан сотган. Кейинроқ эса ҳажмига қараб бутилканинг қиймати 46 долларгача етди. Бу 400 юанга тенг бўлиб, 2 юань атрофида турувчи минерал сувдан 200 марта қимматроқ эди.

Пекинда 6 декабрь куни ҳавонинг ифлосланганлиги туфайли экологик хавфлиликнинг энг юқори – «қизил» даражаси эълон қилинган эди.