Такси буюртма бериш бўйича Хитой компанияси Didi Chuxing томонидан маълум қилинишича, у Америка Apple корпорациясининг 1 млрд долларлик сармоясини жалб этишга муваффақ бўлган, деб хабар қилмоқда Fortune.

Didi Chuxing компаниясида аниқлик киритишларича, жами сармоялар ҳажми 2 млрд доллардан ошиб кетиши мумкин.

«Didi инновацияон намуна бўлиб хизмат қилмоқда. Биз, улар яратган бизнесдан таъсирландик. Улар шунингдек, ажойиб жамоа ва раҳбариятни ташкил эта олишган. Биз уларни айни босқичда қўллаб-қувватламоқчимиз», — деб баёнот берган Apple раҳбари Тим Кук.

Apple сармоялари Хитойдаги Uber билан рақобатда Didi Chuxing компаниясига ёрдам бериши керак. Бироқ, Хитой компаниясининг вакили таъкидлашича, Apple Didi Chuxing директорлар кенгашида ўрин олмайди. 

Аввалроқ, Британиянинг Daily Mail газетаси Foxconn ва Pegatron ходимлари истиқомат қиладиган умумий уйлар суратларини намойиш этган эди. Айни компаниялар Apple маҳсулотларини йиғиш билан шуғулланади.