Баҳрайн Ташқи ишлар вазири шайх Холид ибн Аҳмад Ал-Халифанинг парламент йиғилишида депутатларнинг саволларига жавоб бериш вақтида маълум қилишича, Эрон Баҳрайндаги экстремистик гуруҳлардан ўз мақсадларини амалга оширишда фойдаланиш учун уларни шуғуллантирмоқда.

"Эрон ўз лагерларида террорчи гуруҳларни тайёрлайди. Бу мамлакат Баҳрайн ҳудудига қурол ва портловчи моддалар олиб киради", дейди Ал Халифа.

Вазир Баҳрайн Эроннинг ўз ички ишларига аралашаётгани учун тегишли чораларни қабул қилиши ҳақида айтган.

Шу йилнинг бошида Баҳрайн Саудия Арабистони ва Эрон зиддияти вақтида биринчи бўлиб саудияликлар тарафини олган ва эронликлар билан дипломатик муносабатларини бузган.

Баҳрайн ҳукуматининг ҳисоблашича, 2011 йили мамлакатдаги шиаларнинг суннийлардан иборат подшоҳлик ҳукуматига қарши ўтказган норозилик намойиши ортида Эрон туради.