"Орол денгизи ҳавзасидаги давлатларга ёрдам кўрсатиш бўйича 2011-2015 йилларга мўлжалланган ҳаракатлар дастурлари" доирасидаги лойиҳаларни ўрганиш учун хитойлик экспертларнинг комплекс экспедицияси йўналиши бўйича Ўзбекистон ва Хитой ҳукуматлари ўртасида Алмашув ноталарини имзолаш бўлиб ўтди. Бу ҳақда "Правда Востока" нашри хабар бермоқда.  

Комплекс экспедицияни ўтказиш Ўзбекистон ва Хитой ҳукуматлари ўртасидаги техник-иқтисодий ҳамкорлик ҳақидаги келишувга мувофиқ беғараз ёрдам маблағлари ҳисобига амалга оширилади.

Ўтказилган экспедиция натижаларига кўра, хитойлик экспертлар Оролбўйи ҳудудида ижтимоий-иқтисодий вазиятни яхшилашга қаратилган устувор лойиҳаларни кейинги техник-иқтисодий асослаш ва уларни босқичма-босқич амалга оширишга тайёрлаш учун танлаб олишни режалаштирилмоқдалар.

Лойиҳалардан мақсад – Оролбўйида катта буталардан ўрмон полосаларини яратиш йўли билан экологик кескинликни юмшатишдан иборат, бу эса туз ва қумнинг чиқиб кетишини камайтириш, биотурфаликни тиклаш, балиқчилик тармоғини ривожлантиришга имкон беради.

Эътиборлиси, Хитой билан бундай муҳим келишувларга эришиш Ўзбекистоннинг Оролни қутқариш халқаро жамғармасида раислик қилиши вақтида юз берди. Ўзбекистоннинг 2013 йил августидан жамғарма ижроия қўмитасида раислик қилиши вақтида биргаликдаги амалий ҳаракатлар, дастурлар ва лойиҳаларни амалга ошириш учун халқаро ҳамжамиятнинг эътиборини тортиш ва саъй-ҳаракатларни бирлаштириш бўйича катта кўламли ишлар амалга оширилди. 

Бу саъй-ҳаракатлар Орол денгизи қуриши салбий оқибатларини камайтириш, атроф-муҳитни муҳофаза қилиш ва минтақанинг сув захираларидан оқилона фойдаланиш ҳамда аҳоли турмуш шароитларини яхшилашга йўналтирилган.