Google компанияси Американинг Аризона штатида ўз-ўзини бошқарувчи автомобилларини синовдан ўтказиш учун ҳайдовчиларни ишга қабул қилмоқда, дея хабар берди The Arizona Republic.

Бўлғуси ишчиларга 1-2 йил муддатга 20 доллар ҳажмида соатли тўлов шартномалари  таклиф қилинмоқда. Иш жойи - Чандлер шаҳри. Компания ўз машиналарининг юқори ҳарорат шароитида қандай ишлашини синаб кўрмоқчи. 
Ҳайдовчи автомобиль тизими фаолияти ва унинг ташқи таъсирга реакциясини назорат қилиши ҳамда батафсил ҳисобот бериши керак.

Жамоага автомобиль бошқаришда катта тажрибага эга кишилар қабул қилинмоқда. Саралашдан ўтган ҳайдовчилар ўз иш жойларини сир тутиши талаб қилинади. 

Ўз-ўзини бошқарувчи Google автомобилларинининг синов дастури раҳбари Брайан Торчеллинининг сўзларига кўра, компания бу ишга турли йўналишдаги мутахассисларни жалб қилмоқда.