АҚШ президенти лавозимига номзод Дональд Трамп ўзининг сайловолди кампаниясига қўшимча 100 млн доллар берилиши билан кафолатланди.

Бу маблағларни АҚШнинг энг бой одамларидан бири, казино эгаси Шелдон Аделсон тақдим қилмоқчи, деб хабар бермоқда The New York Times нашри.

Газета маълумотларига кўра, Трамп ва Аделсон жорий ҳафтада учрашишди ва қўшимча хайр-эҳсонлар ҳақида келишиб олишди.

Бу ёрдам миллиардерга жуда асқатади, чунки у шу пайтгача ўз кампаниясини шахсий маблағлари ва тарафдорларининг камтарона хайр-эҳсонлари ҳисобига молиялаштириб келмоқда. Яқинда сиёсатчи сайловолди кампаниясига қўшимча 1 млрд доллар талаб этилиши мумкинлигини айтганди.

82 ёшли Аделсон Лас-Вегасдаги Sands казиносига эгалик қилади ва АҚШ Республикачилар партиясининг энг йирик ҳомийси ҳисобланади. У 2012 йилда партия эҳтиёжлари учун 98 млн доллар ажратган.   

Нашр маълумотларига кўра, магнат ҳозирда партиянинг Конгрессдаги фракциясига ёрдамни камайтириб, барча эътиборини Трампга қаратишга қарор қилган.