Венесуэла президенти Николас Мадуро мамлакат иқтисодиётидаги фавқулодда ҳолат тартибини яна 60 кунга узайтирди, деб хабар қилмоқда Noticias24 телеканали. 

Шундай қилиб, фавқулодда иқтисодий ҳолат тўғрисидаги фармон муддати "мамлакатдаги ижтимоий барқарорликни муҳофаза қилиш учун жами 120 кунга амал қилади". 

Мадуронинг қайд этишича, ушбу тартиб қабул қилинганидан бери 21та қарор қабул қилинган. Улар асосан, мамлакатдаги ижтимоий барқарорликни таъминлаш ҳамда гўёки давлат раҳбариятига нисбатан олиб борилаётган "иқтисодий уруш"га қарши курашга йўналтирилган. 

Таъкидлаш лозим, Венесуэладаги вазият, маҳсулотлар танқислиги, пулнинг кескин қадрсизланиши ва нефтнинг арзонлашуви сабабли давлат даромадларининг пасайиши билан тобора жиддий тус олмоқда. Бундан ташқари, мухолиф парламенти иш бошлагач, ижро ва қонун чиқарувчи давлат органлари ўртасидаги инқироз ҳам иқтисодий аҳволга салбий таъсир этмоқда.