АҚШ ҳарбийлари иштирокида Яқин Шарқ минтақасида ҳар йили ўтказиб келинадиган йирик ҳарбий машғулотлар 15-24 май кунлари Иордания қироллигида бўлиб ўтади, дейилади Пентагон матбуот хизмати тарқатган хабарда. 

"АҚШ ҳарбий хизматчилари Иордания ҳарбий ҳаво кучлари билан ҳамкорликда 15-24 май кунлари бўлиб ўтадиган "Шер ҳамлага ҳозирланмоқда" (Eager Lion-16) номли ҳарбий манёврларга тайёргарлик кўрмоқда. Бу АҚШ Қуролли Кучлари марказий қўмондонлигининг асосий машғулотларидан биридир", - дейилади баёнотда. 

Ҳарбий ҳаво кучлари, ҳарбий денгиз кучлари ва қуруқликдаги қўшинларнинг тахминан 6 мингга яқин ҳарбий хизматчилари "турли кўринишдаги эҳтимолий таҳдидларга қарши биргаликда ҳаракатланиш кўникмаларини ўзлаштиради". Машғулотлар "чегаралар хавфсизлигини таъминлаш, оператив бошқарув, киберҳужумлардан ҳимояланиш ва ҳарбий ҳаракатлар олиб бориш услублари"га оид ўқув режаларини ўз ичига олади.

Одатда, 2011 йилдан бери ўтказиб келинадиган "Шер ҳамлага ҳозирланмоқда" машғулотларида НАТО ва Яқин Шарқ минтақасининг 20га яқин турли давлати вакиллари иштирок этади. Улар орасида, Буюк Британия, Миср, Италия, Канада, Кувайт, Польша, БАА ва Франция кабилар бор.