Дунёдаги энг катта круиз лайнери Harmony of the Seas Франциянинг Сен-Назер шаҳри портидан биринчи сафарига жўнади. Бу ҳақда Agence France-Presse ахборот агентлиги маълум қилди.  

Кема биринчи бўлиб Буюк Британиянинг Саутгемптон шаҳри портига ташриф буюради ва бу ердан биринчи йўловчиларни бортга олади. Шундан кейин кема жанубга йўлга олиб, Пиреней яриморолини айланиб ўтиб, Ўрта Ер денгизи бўйлаб круизга жўнайди. Кеманинг охирги манзили Барселона шаҳри бўлади. 

Агентликнинг маълум қилишича, кеманинг узунлиги 362 метр, эни 66 метр, баландлиги 72 метрни ташкил қилади. Лайнер 6360 йўловчи ва экипажнинг 2 минг аъзосини сиғдира олади. Harmony of the Seas кемаси ўз эгаси – Royal Caribbean International (RCI) компаниясига 12 майда топширилганди. 

2016 йил февралда лайнернинг биринчи суратлари пайдо бўлганди. Ўшанда кема двигателининг такомиллаштирилиши ва ёруғлик-диодли ёруғланишдан фойдаланилгани эвазига бошқа катта кемаларга нисбатан 20 фоизга самаралироқ экани маълум қилинганди.