Расмий Пхеньяннинг маълум қилишича, россиялик спортчилар бўлган "Элфин" яхтаси Япон денгизи ҳудудида англашилмовчилик туфайли тўхтатиб қолинган. Бу ҳақда Россиянинг Шимолий Кореядаги Чхонжин шаҳридаги консулхонаси бош консули Юрий Бочкаревга асосланиб, РИА Новости хабар тарқатган.

Дипломатнинг қайд этишича, бу борада қилинган мурожаатга маҳаллий расмийлар "бу шунчаки тушунмовчилик туфайли рўй бергани" билан изоҳ беришган. Бочкаревнинг қўшимча қилишича, яхта маҳаллий вақт билан соат 15 май куни соат 10:00да (Москва вақти билан соат 04:30да) қўйиб юборилган.

Бош консулнинг айтишича, Шимолий Корея балиқчилари денгизда бортига корейсча ёзувлар битилган яхтани учратишгани ҳақида хабар беришганидан кейин ҳарбийлар денгизга юборилган. Эндиликда Пхеньян Москвадан бу яхта бортига нега корейсча ёзув битилгани бўйича изоҳ сўрамоқда.

Эслатиб ўтамиз, 13 май куни КХДР қирғоқ қўриқлаш хизмати мамлакат иқтисодий ҳудуди чегарасидаги халқаро сувларда Россия яхтасини қўлга олди.Яхта Жанубий Кореянинг Пусан порт шаҳридан Владивостокка қараб кетаётган эди. Яхта Приморьенинг Елканли спорт уюшмасига тегишли бўлиб, унинг бортида беш киши бўлган.У Косон портидан тахминан 80 миль масофада тутилган, капитан чегарани қўриқлайдиган кема бортига етказилган. Яхта шатакка олиниб, Шимолий Корея қирғоғига келтирилган.