"Бавария"нинг польшалик ҳужумчиси Роберт Левандовски Германия чемпионатининг сўнгги турида "Ганновер"га қарши учрашувда гол урди. Учрашув мюнхенликларнинг 3:1 ҳисобидаги ғалабаси билан якунланди.

Польша терма жамоаси ўйинчиси учун бу гол жорий мавсумда Бундеслигадаги 30-гол бўлди. Шу тариқа, футболчи Германия чемпионатида бир мавсумда 30 та гол ура олган биринчи хорижлик ўйинчи бўлди. 27 ёшли футболчи бу борада 2011/2012 йиллардаги мавсумда 29 та гол урган "Шальке"нинг футболчиси Клас-Ян Хунтелардан ўтиб кетди.

Бунгача Бундеслигада 30 та голни охирги марта 1976/1977 йиллардаги мавсумда Дитер Мюллер киритганди.

Левандовски, шунингдек, жорий чемпионатнинг тўпурари бўлди, у 32 та ўйинда рақиблар дарвозасига 30 та гол урди. Польяк шу тариқа ўз фаолиятида бундай муваффақиятга иккинчи маротаба эришди: футболчи 2013/2014 йилларда 20 та гол уриб, чемпионат тўпурарига айланганди.

Тўпурарлар баҳсида 2-ўринни "Боруссия" футболчиси Пьер-Эмерик Обамейянг (31 та ўйинда 25 та гол), 3-ўринни "Бавария"нинг яна бир вакили Томас Мюллер (31 та ўйинда 20 та гол) эгаллади.

"Боруссия"нинг (Дортмунд) яна бир ўйинчиси Генрих Мхитарян 15 та голли узатма билан энг яхши ассистент бўлди.