Лондон шаҳрининг собиқ мэри Борис Жонсон Европа Иттифоқ режалари ва фашистик Германия доҳийси Адольф Ҳитлер ҳамда француз императори Наполеон Бонапартнинг мақсадлари ўртасида умумийлик кўришини маълум қилди. У бу уч томон ҳам Европани ягона мафкура ва ягона бошқарув остида бирлаштириш мақсадини ифодалагани ҳақида гапирган. Унинг бу ҳақдаги сўзлари Sunday Telegraph нашрига берган интервьюсида келтирилган.

У шунингдек, тарихда ҳам римликлар империяси бутун Европани бир байроқ остида бирлаштиришга ҳаракат қилишганини эслатиб ўтган.

"Брексит"ни (Британиянинг ЕИ таркибидан чиқиши бўйича ғоя) фаол равишда тарғиб қилувчи, Консерваторлар партияси намоёндаси бўлган Борис Жонсон на Наполеон ва на Ҳитлер ўз мақсадига эриша олмагани ҳақида гапирган. У Европа Иттифоқи ҳам уларники каби ғояни бошқача усулларда амалга ошириш эканини таъкидлаган.

"Гап шундаки, ягона Европа ғоясига садоқатлилик етишмайди ва бу азалий муаммо. Барча ҳурмат қиладиган ва қабул қиладиган ягона ҳокимиятга эришиб бўлмайди. Айнан шунинг учун, бу ўринда демократик вакуум юзага келади", дейди "Брексит" ташаббускорлари етакчиларидан бири.

Муолифатдаги Лейбористлар партияси вакилларидан бири, "ЕИда қолиш" кампанияси етакчиси Иветт Купер Борис Жонсонни "ғирром ўйин олиб бориш"да айблаган.

Унинг сўзларига кўра, Жонсон Европада тинчликни сақлаб туришга хизмат қилаётган институтни миллионлаб кишиларнинг ёстиғини қуритган нацист диктатураси билан қиёслаши тўғри эмас.

Буюк Британиянинг ЕИдан чиқиши масаласи ҳал этиладиган умумхалқ референдуми 23 июнь кунига белгиланган. Унда сайловчилар ЕИ таркибидан чиқиш ёки ЕИда қолиш учун овоз беришади.