Германия ташқи ишлар вазирлиги Ливиядаги вазиятни барқарорлаштириш учун йўналтирилиши мўлжалланаётган Халқаро миграция ташкилотига 4,5 млн евро тақдим қилади, деб хабар бермоқда ТАСС ахборот агентлиги. 

Германия ташқи ишлар вазирлигида таъкидланишича, лойиҳанинг мақсади ички кўчирилган шахслар, қочқинлар, муҳожирлар ва уларни қабул қилувчи жамоалар ҳисобланади. Лойиҳанинг амалга оширилиши май ойида бошланади.  

Тадбирларни Ливиянинг жанубида, Нигер ва Чад билан чяегарасида амалга ошириш режалаштирилмоқда. Унда асосий инфратузилманинг тикланиши, оилалар учун марказлар яратиш, профессионал таълим соҳасида кўмак кўрсатиш, кичик бизнесни ривожлантириш, маҳаллий кучлар, нотижорат ташкилотлари ва жамоалар ўртасида суҳбатлашув ҳисобига  тинчлик жараёнига кўмаклашиш кўзда тутилган. 

Июнда Ливиянинг қолган қисмларида ҳам ички кўчирилганларни қўллаб-қувватлаш лойиҳасини амалга ошириш учун яна 1 млн евро ажратиш режалаштирилмоқда.

Аввалроқ Германия Ливиядан қочқинлар оқими кўпайишидан хавотирланаётгани маълум қилинганди.