Англия Премьер-лигасининг охирги туридан қолдирилган «Манчестер Юнайтед» — «Борнмут» учрашуви 17 май куни ўтказилади.

Бу учрашув 15 май куни турнинн барча учрашувлари каби Тошкент вақти билан соат 19:00да бошланиши керак бўлган, аммо трибуналардан бири ҳудудидан топилган шубҳали буюм туфайли мухлислар эвакуация қилиниб, ўйин номаълум муддатга қолдирилганди.

«Манчестер Юнайтед» жамоасининг твиттердаги саҳифасида келтирилишича, учрашув 17 май куни Тошкент вақти билан соат 23:55да бошланади.

Қайд этиш керакки, «қизил иблислар» турнир жадвалида 4-ўринга кўтарилиш учун фақат назарий жиҳатдан имконият сақлаб турибди. Айни вақтда тўртинчи ўринни эгаллаб турган «Манчестер Сити»ни қувиб ўтиш ва кейинги мавсумда ЕЧЛда ўйнаш ҳуқуқини қўлга киритиш учун Луи ван Гаал шогирдлари охирги учрашувда камида 19та тўп фарқи билан ғалаба қозониши талаб этилади.