Венецияда полициячилар ўз смартфонини олиш учун каналга сакраган сайёҳни қутқариб қолишди. Сайёҳ қиз селфи суратга тушаётиб, тасодифан телефонини сувга тушириб юборди. Шундан сўнг, у қурилмани олиш учун сувга шўнғиган.

Бироқ унинг смартфонни топиш учун қилган ҳаракати омадли якунланмади. Охир-оқибат, қиз қирғоққа сузиб келди ва уни полициячилар қутқариб олишди.

Гувоҳлар томонидан олинган видео итальян ижтимоий тармоқларида машҳур бўлиб кетди. Сабаби, маҳаллий аҳоли мазкур каналда ҳеч қачон сузмаган – у Европадаги энг ифлос сув саналади. Каналга турар-жой ва кўчалардаги ишлатиб бўлинган оқава сувлар қўшилган: экспертлар фикрига кўра, шаҳар бу каналга инсон томонидан ишлатилган чиқиндиларнинг 90 фоизини юборади.  

Сўнгги икки йил ичида канал суви бўйича ўтказилган тадқиқотлар унда инсон саломатлиги учун хавфли бўлган кўплаб вируслар, жумладан, гепатит А мавжудлигини кўрсатади.