Ҳар бир халқнинг тарихи, маданияти, турмуш тарзи, миллий анъана ва қадриятларини ўрганиш, уларни тарғиб этиш ва келгуси авлодларга етказишда музейлар муҳим аҳамият касб этади.

Халқаро музейлар кенгашининг бош конференцияси қарорига мувофиқ 18 май - Халқаро музейлар куни сифатида бутун дунёда 1977 йилдан бери нишонланиб келмоқда.

Халқаро музейлар куни муносабати билан Элликқалъа туманидаги С.П.Толстов номидаги археология ва тарих музейида тадбир бўлиб ўтди. Тадбирда тадқиқотчи олимлар, археологлар, тарихшунослар,  ўқувчи-ёшлар иштирок этди.

Тадбир иштирокчилари археология ва тарих музейидан жой олган тарихий обидалардан топилган асори - атиқалар, маҳаллий халқлар амалий санъати наъмуналари ва этнографиясига оид буюмлар ҳамда туманда бўлиб ўтган тадбирлар, анжуманлар акс эттирилган стендлар, видео ва кино тасмаларидан иборат 3000 га яқин экспонатларни томоша қилиш имкониятига эга бўлишди. Байрам муносабати билан музей жамоаси 2 кун давомида аҳолига бепул хизмат кўрсатади.   

 Шунингдек Бўстон шахрида жойлашган “Очиқ осмон остидаги музей”, Бўстон академик лицейидаги “Муҳаммад Юсуф” номидаги, Элликқалъа санъат ва педагогика коллежидаги “Отажон Худойшукуров” музейларида  Халқаро музейлар куни кенг нишонланди. Сана муносабати билан туманда барпо қилинган музейлар фондини янада бойитиш, Республикамиздаги музейлар билан билан ўзаро ҳамкорликни йўлга қўйиш, музейларга маҳаллий ҳамда чет эллик сайёҳларни кўпроқ жалб қилиш устида олиб борилаётган ишлар самараси тадбир иштирокчилари томонидан  кенг муҳокама қилинди.

Дилшодбек Жуманиёзов.