14 майда Москванинг Хован қабристонидаги оммавий муштлашув вақтида ҳалок бўлган уч нафар тожикнинг жасадлари Душанбега етказилди. Ҳалок бўлганларнинг барчаси Тожикистоннинг Рўдун шаҳридан бўлишган, деб хабар бермоқда "Интерфакс" ахборот агентлиги. 

26 ёшли Сухроб Хушақов, 39 ёшли Иноят Ризоев ва 42 ёшли Сайнуриддин Собировнинг жасадлари Тожикистон пойтахтига "Тажик Эйр" авиакомпанияси рейси билан етказилди. Ҳалок бўлганларни уларнинг яқинлари, Тожикистон меҳнат ва ижтимоий муҳофаза вазири Сумангул Тоғўзода кутиб олдилар.

Қабристондаги муштлашувда камида 250 киши иштирок этган. Оқибатда 3 киши ҳалок бўлган, 30 га яқин киши шифохонага етказилган. Россия Тергов қўмитаси расмий вакили Владимир Маркиннинг айтишича, тергов муштлашувга асосий сабаб молиявий масалалар бўлганини тахмин қилмоқда. 

Воқеа юзасидан Москва терговчилари "Икки ёки ундан ортиқ шахсни олдиндан тил бириктириб ўлдириш", " ноқонуний ҳолда қурол-аслаҳа сақлаш" ва "безорилик" моддалари бўйича жиноий иш қўзғатдилар.

Шунингдек, тергов муштлашувнинг келиб чиқишида қабристоннинг собиқ директори Юрий Чабуевдан гумон қилмоқда.