Туркиянинг жануби-шарқидаги Хаккари вилоятида жойлашган Шемденли туманида содир этилган портлаш туфайли 4 нафар ҳарбий хизматчи ҳалок бўлган. Hurriyet нашрининг ҳарбий манбага асосланиб хабар қилишича, бу теракт Курдистон ишчилар партияси (КИП) томонидан амалга оширилган.

Қўлда тайёрланган портловчи қурилма ҳарбий транспорт ўтаётган вақтда йўл четида ҳаракатга келтирилган. Ҳодиса ҳудудида курдлар томонидан ўрнатилган миналарни бартараф этиш амалиёти ўтказилаётган бўлган.

Туркия ҳукумати ва КИП ўртасидаги низолар янгиланганидан буён бўлиб ўтган тўқнашувлар ва терактлар туфайли 450 нафардан ортиқ туркиялик ҳарбийлар ва полициячилар ҳалок бўлган. Туркия бош штаби маълумотига кўра, ўтган вақт ичида 4500дан ортиқ курд жангариси йўқ қилинган. Шу билан бир вақтда, курдларнинг халқ демократик партияси ҳалок бўлганлар орасида юзлаб тинч аҳоли вакиллари борлигини иддао қилган.