2016 йил 19 май куни Ўзбекистон Республикаси Меҳнат вазирлиги томонидан “2016 йил январь-апрель ойларида аҳолини иш билан таъминлаш, меҳнат ва меҳнат ҳуқуқи муҳофазаси ҳамда бошқа масалалар юзасидан Меҳнат вазирлиги томонидан амалга оширилган ишлар” мавзусида видеоселектор кўринишидаги матбуот анжумани ўтказилди. 

2016 йилнинг 4 ойи давомида жами 2212 та, жумладан, Назорат қилувчи органлар фаолиятини мувофиқлаштирувчи Республика Кенгаши томонидан тасдиқланган режа асосида 183 та; ваколат доирасида бюджетдан молияланадиган корхоналарга 608 та, ҳуқуқ тартибот идорлари билан ҳамкорликда 508 та ҳамда назорат тартибида ва бошқа масалаларда 875 та текширув ўтказилган. Шу билан бирга жисмоний ва юридик шахсларнинг хўжалик юритувчи субъектларига алоқадор 1898 та ариза ва шикоятлари кўриб чиқилган, шундан 985 таси қаноатлантирилган. Мазкур ҳолатлар юзасидан иш берувчи мансабдор шахсларга нисбатан тегишли таъсир чоралари қўллаш орқали 887 та фуқароларнинг бузилган ҳуқуқлари тикланган. 

Ўзбекистон Республикаси Меҳнат вазирлигининг Давлат меҳнат техник испекторлар томонидан республика бўйича 804 та корхона ва ташкилотларда ўтказилган текширишлар натижасида аниқланган камчиликлар юзасидан бажарилиши мажбурий бўлган 804 та берилган ёзма кўрсатмаларнинг 750 таси (92,2 фоиз)га корхона ва ташкилотлардан ёзма кўрсатмалар ижроси борасида жавоблар олинган. Меҳнат қонунчилиги ва меҳнатни муҳофаза қилиш қоида ва меъёрларига амал қилинмаганлиги учун 681 нафар мансабдор шахсларга нисбатан маъмурий жарималар қўлланилган. 

Назорат қилувчи органлар фаолиятини мувофиқлаштирувчи Республика кенгашининг 2009 йил 6 мартдаги мажлиснинг 1-сонли баёни ижросини таъминлаш мақсадида жорий йил ўтган давр давомида профилактика ишларини олиб бориш мақсадида 2098 та тадбиркорлик субъектларида бевосита жойларга чиқилиб тушунтириш ишлари олиб борилди ва 566 та семинарлар ўтказилди ва бу семинарларда 12189 нафар тадбиркорлик субъектлари вакиллари қатнашган ҳамда 144  марта оммавий ахборот воситалари орқали чиқишлар уюштирилиб, тегишли тавсиялар берилган.