Еврокомиссиянинг одам савдоси муаммоларига бағишланган маърузасига кўра, жиноятчи гуруҳлар ўз бизнесини фаоллаштириш учун муҳожирлик инқирозидан фойдаланаётган бўлиши мумкин. Бу ҳақда The Guardian нашри хабар ёзган

Жиноятчилик тизимлари натижасида минглаб муҳожир болалар сотиб юборилган бўлиши мумкин. Январь ойида 10 минг бола Европага келгандан сўнг йўқолган. Германия 4700 нафар боланинг йўқолганини маълум қилди, Швецияда эса ҳафтасига 10 нафар қаровсиз бола ғойиб бўлмоқда. 

Расмий маърузада билдирилишича, уюшган жиноятчи гуруҳлар асосий диққатини болаларга қаратган. Олти ойдан бошлаб 10 ёшгача бўлган болалар 4 минг евродан 8 минг еврогача бўлган қийматда сотилмоқда ва сотиб олинмоқда, баъзи ҳолатларда улар 40 минг еврогача пулланади. 

Расмий маълумотларга кўра, ЕИ ҳукумати 2013-2014 йилларда 15 846 нафар одам савдоси қурбонларини қайд этган, шу жумладан уларнинг 2375 нафари болалар, бироқ маъруза муаллифлари қурбонлар сони  аслида бундан кўплигига шубҳа қилишмайди. Уларнинг учдан икки қисми жинсий қулликка топширилган, тахминан бешдан бир қисми мажбурий меҳнат билан банд, аксарият ҳолларда улар қишлоқ хўжалигида фаолият кўрсатишади.

Бундан ташқари, қурбонлар уй қуллигига ҳам топширилиб, мажбуран садақа сўраш билан шуғулланишади. 

Бундан аввалроқ, 2015 йил Германияда 6 мингдан ортиқ вояга етмаган қочоқларнинг йўқолгани ҳақида хабар берилган эди.