Жорий йилнинг ёзидан Москва шаҳридаги масжидлар ҳудудида велосипедлар учун тураргоҳлар барпо этилади. Москва мусулмонлари диний бошқармаси сайтида келтирилган хабарга кўра, илк тураргоҳлар Москва жомеъ масжиди ва Мемориал масжидда ўрнатилади.

"Ёзги мавсум келиши муносабати билан шундай қарор қабул қилинди. Бундан аввал кўп марта масжидларга велосипедлар ўрнатиш бўйича мурожаатлар берилганди. Ҳаёт шиддат билан ривожланадиган улкан мегаполисларда велосипед оммавий транспорт воситаси ҳисобланади. Қолаверса бу восита экологик жиҳатдан афзал. Москванинг ташқи қиёфаси йилдан-йилга ўзгариб, яхшиланиб бормоқда. Мусулмонлар ҳам замондан ортда қолаётгани йўқ", дея Москва муфтийси Илдар Аляутдиновнинг сўзларини келтиради сайт.

Велотураргоҳлар Рамазон ойи бошланишига (7 июндан 4 июлгача) қадар тайёр бўлиши режалаштирилган. Айнан шу даврда масжидларга намозхонларнинг келиши кўпаяди.

23 сентябрь куни  Европадаги энг йирик жомеъ масжид бўлмиш Москва жомеъ масжиди реконструкциядан сўнг қайта очилганди.

1904 йилда очилган Москва жомеъ масжиди реконструкция қилинди. Масжид жойлашган ҳудуд 964 квадрат метрдан 18 900 квадрат метрга кенгайтирилган. Бино олти қаватдан иборат, 7 та лифт билан жиҳозланган. Масжид бир пайтнинг ўзида 10 минггача кишини сиғдира олади.