«Барселона» ҳужумчиси Неймар каталонияликлар раҳбарияти билан шартномасини узайтириш борасида келишувга эришган. 

El Mundo Deportivo нашри маълумотига кўра, футболчи 30 ёшигача жамоада қолиши мумкин. Манбанинг хабар беришича, бразилиялик футболчининг янги келишуви 2022 йилга қадар мўлжалланган бўлади.

Бундан олдинроқ, унинг янги шартномаси муддати 2021 йилгача бўлиши ҳақида хабар берилганди.

«Барселона» раҳбарияти Неймар билан шартномани 22 май куни «Севилья»га қарши кечадиган Испания Кубоги финалидан сўнг имзолашни режалаштирган.

Аввалроқ Неймарнинг шартномаси узайтирилгач, унинг товон пули миқдори 190 миллион евродан 220 миллион еврога ошиши ҳақида маълум қилинганди.

Неймарнинг «Барселона» билан амалдаги шартномаси 2018 йилгача мўлжалланган.